మూడు కార్పొరేషన్లలో టీఆర్ఎస్ జెండా ఎగురవేస్తాం ఫేక్ పెట్టుబడులపై శ్వేతపత్రం విడుదల చేయాలి.. లేకుంటే గ్లోబల్ ఇన్వెస్ట్‌మెంట్ సమ్మిట్‌ను అడ్డుకుంటాం

మూడు కార్పొరేషన్లలో టీఆర్ఎస్ జెండా ఎగురవేస్తాం

ఫేక్ పెట్టుబడులపై శ్వేతపత్రం విడుదల చేయాలి.. లేకుంటే గ్లోబల్ ఇన్వెస్ట్‌మెంట్ సమ్మిట్‌ను అడ్డుకుంటాం

మియాపూర్‌ రాజధాని రణభేరి సభలో టీఆర్ఎస్ అధ్యక్షురాలు కల్వకుంట్ల కవిత

హైదరాబాద్, నవోదయం ప్రతినిధి: గ్రేటర్ హైదరాబాద్‌తో పాటు సైబరాబాద్, మల్కాజిగిరి కార్పొరేషన్ల ఎన్నికల్లో తెలంగాణ రక్షణ సేన (టీఆర్ఎస్) జెండా ఎగురవేస్తామని ఆ పార్టీ అధ్యక్షురాలు కల్వకుంట్ల కవిత ధీమా వ్యక్తం చేశారు. రాష్ట్ర రాజధాని హైదరాబాద్‌లోని మియాపూర్‌లో తెలంగాణ రక్షణ సేన ఆధ్వర్యంలో నిర్వహించిన ‘టీఆర్ఎస్ రాజధాని రణభేరి సభ’లో ఆమె కాంగ్రెస్ ప్రభుత్వంపై తీవ్ర విమర్శలు చేశారు. రాష్ట్రంలో పెట్టుబడుల పేరుతో ప్రజలను మభ్యపెడుతున్నారని ఆరోపిస్తూ, ఇప్పటివరకు రాష్ట్రానికి వచ్చిన పెట్టుబడులపై శ్వేతపత్రం విడుదల చేయాలని డిమాండ్ చేశారు. లేనిపక్షంలో డిసెంబర్‌లో నిర్వహించనున్న గ్లోబల్ ఇన్వెస్ట్‌మెంట్ సమ్మిట్‌ను అడ్డుకుంటామని హెచ్చరించారు.

ఈ సందర్భంగా కవిత మాట్లాడుతూ.. ఫేక్ ఎంవోయూలతో వేల కోట్ల రూపాయల పెట్టుబడులు వచ్చాయని కాంగ్రెస్ ప్రభుత్వం గొప్పలు చెప్పుకుంటోందని విమర్శించారు. గతంలో నిర్వహించిన ఇన్వెస్ట్‌మెంట్ సమ్మిట్‌ల ద్వారా వాస్తవంగా ఎన్ని పెట్టుబడులు వచ్చాయో ప్రజలకు వివరించాలని డిమాండ్ చేశారు. ఆరున్నర లక్షల కోట్ల రూపాయల పెట్టుబడులు వచ్చాయని చెబుతున్న ప్రభుత్వం, వాటి వివరాలను వెల్లడించాలని కోరారు. పారిశ్రామిక అవసరాల కోసం రైతుల నుంచి సేకరించిన భూములను దుర్వినియోగం చేస్తున్నారని ఆరోపించారు.

హైదరాబాద్‌కు కనీస సౌకర్యాలు కల్పించాలి

నాలుగు వందల ఏళ్ల చరిత్ర కలిగిన హైదరాబాద్ తెలంగాణకు గుండెకాయలాంటిదని కవిత అన్నారు. తెలంగాణ ఉద్యమ సమయంలో హైదరాబాద్‌ను కేంద్రపాలిత ప్రాంతంగా మార్చాలన్న ప్రతిపాదనలను అంగీకరించలేదని గుర్తుచేశారు. రాష్ట్ర జనాభాలో గణనీయమైన భాగం హైదరాబాద్‌లోనే నివసిస్తున్నారని, ఇక్కడి ప్రజల జీవన ప్రమాణాలు మెరుగుపడేలా ప్రభుత్వం చర్యలు తీసుకోవాలని సూచించారు.

ఒకప్పుడు ముత్యాల నగరంగా, ఐటీ రంగానికి కేంద్రంగా పేరొందిన హైదరాబాద్‌లో నేడు కనీస సౌకర్యాల కొరత కనిపిస్తోందని విమర్శించారు. నగరంలోని పలు ప్రాంతాల్లో తాగునీటి సమస్యలు, డ్రైనేజీ నీరు మంచినీటిలో కలిసిపోవడం, రహదారులపై గుంతలు, వీధి దీపాల నిర్వహణలో లోపాలు ప్రజలను ఇబ్బందులకు గురిచేస్తున్నాయని పేర్కొన్నారు. రూ.11 వేల కోట్ల బడ్జెట్ ఉన్న జీహెచ్ఎంసీలో రహదారుల పరిస్థితి ఇంత దారుణంగా ఉండటమేంటని ప్రశ్నించారు.

బిర్యానీ, ఇరానీ చాయ్, ముత్యాలకు ప్రసిద్ధిగాంచిన హైదరాబాద్‌ను దోమలు, వీధి కుక్కల సమస్యలు వేధిస్తున్నాయని అన్నారు. జవహర్‌నగర్ డంప్‌యార్డ్ పరిసరాల్లో కాలుష్యాన్ని నియంత్రించేందుకు చర్యలు తీసుకోవాలని డిమాండ్ చేశారు. నగర ప్రజలకు స్వచ్ఛమైన తాగునీరు, మెరుగైన డ్రైనేజీ వ్యవస్థ, నాణ్యమైన రహదారులు, పారిశుధ్య నిర్వహణ అందుబాటులో ఉండాలని పేర్కొన్నారు.

ఐటీ ఉద్యోగుల భవిష్యత్తుకు భరోసా కల్పించాలి

హైదరాబాద్‌ను ఐటీ నగరంగా తీర్చిదిద్దడంలో ఐటీ ఉద్యోగులు చేసిన కృషిని కవిత అభినందించారు. అయితే కృత్రిమ మేధస్సు (ఏఐ) ప్రభావంతో ఉద్యోగ భద్రతపై ఆందోళనలు పెరుగుతున్నాయని, ఐటీ ఉద్యోగుల ప్రయోజనాలను కాపాడేందుకు ప్రత్యేక విధానం అవసరమని అభిప్రాయపడ్డారు. ఐటీ ఉద్యోగులకు అండగా నిలిచేందుకు తమ పార్టీ పోరాటం చేస్తుందని తెలిపారు.

పారిశుధ్య కార్మికుల ఉపాధికి రక్షణ

నగరంలో చెత్త సేకరణ ద్వారా జీవనోపాధి పొందుతున్న కార్మికుల ఉపాధికి ఎలాంటి నష్టం కలగకుండా చూడాలని కవిత కోరారు. చెత్త సేకరణ రంగంలో పనిచేస్తున్న వేలాది మంది కార్మికుల ప్రయోజనాలను కాపాడాలని, కాంట్రాక్టుల పేరుతో వారి ఉపాధిని దెబ్బతీయవద్దని ప్రభుత్వానికి సూచించారు. కార్మికులకు అన్యాయం జరిగితే ముఖ్యమంత్రి నివాసం ఎదుట చెత్తను తీసుకెళ్లి వేస్తామని హెచ్చరించారు.

కేవలం సమస్యలను ప్రస్తావించి వదిలేయడం తమ విధానం కాదని, ప్రజా సమస్యలపై ప్రశ్నించడంతో పాటు పరిష్కారాల కోసం పోరాడుతామని చెప్పారు. రైతుల సమస్యలపై సైతం తమ పార్టీ నిరంతరం పోరాటం చేస్తుందని పేర్కొన్నారు.

యువత, మహిళలకు రాజకీయాల్లో ప్రాధాన్యం

యువత, మహిళలు రాజకీయాల్లోకి రావాలని కవిత పిలుపునిచ్చారు. ప్రజలకు సేవ చేయాలనే సంకల్పంతో రాజకీయాల్లోకి వచ్చే వారు ఎన్నికల సమయంలోనే కాకుండా నిరంతరం ప్రజల మధ్య ఉండాలని సూచించారు. ప్రజలకు తమ సమస్యలు పరిష్కరించగల నాయకులుగా నమ్మకం కలిగించాలని పార్టీ శ్రేణులకు దిశానిర్దేశం చేశారు.

టీఆర్ఎస్ అధికారంలోకి వస్తే ప్రజలకు ఉచిత విద్య, వైద్యం అందించడంతో పాటు నగరంలో మెరుగైన రహదారులు, తాగునీరు, డ్రైనేజీ వంటి మౌలిక సదుపాయాలు కల్పిస్తామని హామీ ఇచ్చారు. నిరుద్యోగ యువతను వ్యాపారవేత్తలుగా తీర్చిదిద్దేందుకు రూ.2 లక్షల నుంచి రూ.20 కోట్ల వరకు రుణాలు అందించే కార్యక్రమాన్ని చేపడతామని ప్రకటించారు. మహిళలను కోటీశ్వరులను చేస్తామని చెప్పిన కాంగ్రెస్ ప్రభుత్వం ఇచ్చిన హామీలను నిలబెట్టుకోవడంలో విఫలమైందని విమర్శించారు.

మైనారిటీల సంక్షేమానికి కృషి చేస్తాం

ముస్లింలను రాజకీయ పార్టీలు ఓట్ల కోసం ఉపయోగించుకుని మోసం చేశాయని కవిత ఆరోపించారు. మైనారిటీల సంక్షేమానికి తమ పార్టీ కట్టుబడి ఉంటుందని, వారు టీఆర్ఎస్‌లో చేరి ప్రజా ఉద్యమంలో భాగస్వాములు కావాలని ఆహ్వానించారు. పాతబస్తీ రాజకీయ నాయకులు ప్రజలకు జవాబుదారీగా వ్యవహరించాలని సూచించారు. ప్రతి డివిజన్‌లో 24 గంటలు పనిచేసే ఆసుపత్రులు, మెరుగైన ప్రభుత్వ పాఠశాలలు అందుబాటులో ఉండాలని పేర్కొన్నారు.

క్రమశిక్షణతో పనిచేయాలి

టీఆర్ఎస్ కొత్త పార్టీ కావడంతో ఇతర పార్టీల కంటే ఎక్కువగా కష్టపడి ప్రజల్లోకి వెళ్లాలని కవిత పార్టీ నాయకులు, కార్యకర్తలకు సూచించారు. ఎమ్మెల్యేలు, ఎంపీలు, కార్పొరేటర్లుగా పోటీ చేయాలనుకునే వారు ప్రజలతో నిరంతరం సంబంధాలు కొనసాగించాలని అన్నారు. హైదరాబాద్‌లోని మూడు కార్పొరేషన్ల ఎన్నికలను లక్ష్యంగా చేసుకుని ఇప్పటి నుంచే సిద్ధం కావాలని పిలుపునిచ్చారు.

పార్టీ తరఫున ఎమ్మెల్సీ అభ్యర్థిగా పోటీ చేస్తున్న శ్రీకాంత్ గౌడ్‌కు మద్దతుగా నిలవాలని కోరారు. హైదరాబాద్, మహబూబ్‌నగర్, రంగారెడ్డి ఎమ్మెల్సీ ఎన్నికలకు కూడా పార్టీ శ్రేణులు సమాయత్తం కావాలని సూచించారు. ప్రజా సమస్యల పరిష్కారం, నగర అభివృద్ధి లక్ష్యంగా క్రమశిక్షణతో పనిచేసి రాబోయే ఎన్నికల్లో విజయమే లక్ష్యంగా ముందుకు సాగాలని కవిత పిలుపునిచ్చారు.